Kreu i Organizatës Botërore të Shëndetësisë, Tedros Adhanom Ghebreyesus ka bërë një deklaratë mjaft shqetësuese në lidhje me koronavirusin.
Gjatë konferencës së mbajtur në Gjenevë, kreu i OBSH tha se personat e prekur nga koronavirusi mund të infektojnë sërish të tjerët edhe pas shërimit. Sipas tij, pacientët që shërohen nga koronavirusi duhet që të mbajnë masa mbrojtëse edhe dy javë pas shërimit.
“Personat e prekur nga koronavirusi, mund të infektojnë të tjerët, edhe pas shërimit dhe kur nuk kanë asnjë simptomë. Kështu që masat e mbrojtjes duhet të vijojnë së paku edhe dy javë pas zhdukjes së simptomave”, tha ai.
Tedros Adhanom Ghebreyesus theksoi se numri i viktimave të shënuara nga koronavirusi në botë, ia ka kaluar shifrave të shënuara në Kinë. Si rrjedhojë në shumë vende janë sugjeruar masa shtesë si mbyllja e shkollave, eventeve sportive dhe aktiviteteve të tjera publike.
Sipas tij, mënyra më e mirë për të parandaluar infeksionin, është ndërprerja e rrjetit të transmetimit dhe se për ta bërë një gjë të tillë është i nevojshëm izolimi dhe testimi.
Kujtojmë se koronavirusi ka shënuar mbi 7 mijë viktima në rang global, ndërsa numri total i të infektuarve ka shkuar në rreth 180 mijë.
