Pas letrës së një djali të vogël italian, i cili shprehej se të gjithë do e mposhtnin koronavirusin, një tjetër status në rrjetet sociale bëhet virale. Mesazhi prekës vjen nga një mësuese italiane, e cila nuk ka shkuar në familjen e saj, me frikën se mund të infektonte të atin e saj të moshuar.
Ajo ka lindur në Calabria, por ka jetuar për një kohë të gjatë në Lombardi. Në këto ditë emergjente, mësuesja e matematikës i ka shkruar një letër prekëse të atit të saj, që jeton në Calabria.
Katya Imbalzano ka shkruar në Facebook disa rreshta, për t’i shpjeguar të atit se përse nuk do të takohen. Ajo i shkruan atij se e do aq shumë, saqë ka vendosur t’i qëndrojë larg, nga frika se mund të jetë infektuar dhe mund të çojë virusin te të afërmit e saj.
“I dashur baba, në këtë orë të gjithë po ia mbathin nga Milano, për t’iu bashkuar të dashurve të tyre. Unë nuk e kam bërë.
Mos mendo që nuk të dua… të dua kaq shumë saqë kam vendosur të të qendroj larg. Më thuaj që je mirë dhe po merr të gjitha masat parandaluese, është mirë kështu. Të dua nga largësia. Do të përqafohemi shpejt”, shkruan ajo.
Po kështu ajo ka shpjeguar pse ka ardhur kjo zgjedhje. “U preka nga pamjet e eksodit të shumë personave që të frikësuar, ktheheshin tek njerëzit e tyre me trenin e parë të disponueshëm. Menjëherë mendova për njeriun që dua më shumë, babin, që është i vjetër dhe në këto momente ndodhet larg meje. Sigurisht, që mendimi i parë ishte të braktisja gjithçka e të nisesha, pastaj reflektova dhe nuk e bëra për të mirën e tij”, u shpreh ajo.
Italia është një ndër vendet më të prekura nga koronavirusi në Europë. Mjekët italianë kanë paralajmëruar mjekët në të gjithë Europën që të “përgatiten” për koronavirusin. Në Itali, e cila është bërë zyrtarisht vendi i dytë në botë më i prekur pas Kinës, me më shumë se 7000 raste, spitalet janë duke u mbingarkuar.
Në ditët në vijim, rajoni i Lombardisë në Itali mund të përgatisë masa edhe më shtrënguese për të shmangur përhapjen e koronavirusit. Kjo u njoftua nga këshilltari rajonal i mirëqenies Giulio Gallera, i cili shpjegoi se infeksioni ishte aq i shpejtë sa në 18 ditë, rrezikoi seriozisht sistemin shëndetësor të rajonit. “Deri më tani nuk ka asnjë shenjë se numri i infeksioneve ka nisur të ulet, përveç në zonën e kuqe të Lodigiano, ku ne kemi miratuar masa shumë të forta. Prandaj, në dritën e këtyre rezultateve, Lombardia po mendon të ndalojë aktivitetet e transportit dhe të prodhimit”.
