Për shkak të koronavirusit, teshtitja në shumë vende të prekura, alarmon aktualisht shumë njerëz. Në fakt ajo është një dukuri mëse e zakonshme. Teshtitja shkaktohet zakonisht nga një mbingarkesë e hundës me sekrecione. Prandaj pas 2-3 teshtitjeve, ne ndihemi zakonisht më mirë. Shumë studime, kanë hedhur poshtë mitin e shumëpërhapur, sipas të cilit gjatë teshtitjes zemra ndalet së funksionuari për disa çaste, apo se teshtitjet e tepërta mund të shkaktojnë një sulm në zemër. Natyrisht, është vërtetuar se gjatë teshtitjes rrahjet e zemrës ngadalësohen, por nuk ndalen.
Këtë e vërteton rasti ekstrem i britanikes Dona Grifits. Ajo mban ende sot Rekordin Botëror Ginnes për teshtitjen më të gjatë të regjistruar ndonjëherë në histori. Ajo teshtiti gjithsej 978 ditë rresht pa u ndalur. Dona nisi të teshtijë më 13 janar 1981, dhe përfundoi më 16 shtator 1983. Vetëm vitin e parë, pati mbi 1 milionë teshtima. Ekspertët nuk patën një përgjigje shteruese mbi këtë dukuri, por ia atribuuan një forme të rëndë të alergjisë. Për shkak të edukatës, shumë njerëz filluan ta frenojnë teshtimën.
Por ekspertët nuk e këshillojnë këtë gjë, pasi mund të pësoni dëmtime serioze në organet e brendshme. Madje në disa raste, njerëzit kanë pësuar thyerjen e disa brinjëve, vetëm pse kanë mbajtur brenda presionin e ajrit që shkakton teshtima. Ekspertët llogarisin se në rastet e teshtimave të forta, shpejtësia e daljes së një teshtime mund t’i kalojë 160 km/h. Veç nesh, teshtijnë shpesh edhe kafshët si qeni, macja apo pula, por edhe elefantët. /TIRANA TODAY
