Një ngjarje e rëndë u regjistrua dje në fshatin Ostren të Bulqizës ku nëna me dy fëmijët humbën jetën për shkak të rrjedhjes së gazit.
Por vëllai i viktimës nuk mendon se kjo ka qenë arsyeja pse ata humbën jetën. Në një prononcim për BalkanWeb, ai tregon se ka qenë i pari që ka hyrë brenda banesës ku ka konstatuar vdekjen e motrës, mbesës Rudinës 18 vjeçe dhe nipit Fatjonit, 14 vjeç.
Sipas tij, familja Tola nuk ka gjetur vdekjen nga rrjedhja e gazit, pasi ai shprehet se e ka gjetur bombolën jashtë në oborr. Ai dyshon se ata mund të jenë helmuar nga ushqimi që kanë konsumuar.
“Nuk ka qenë nga gazi, as mangalli dhe as nga ngrohja elektrike. Një bombol 5 litërshe ka qenë jashtë banese kur kemi shkuar. Nuk ka qenë rrjedhje gazi. Kanë ndërruar jetë rreth orës 22:00-23:00 të së enjtes dhe kemi gjetur supë në një pjatë dhe e kemi dërguar për t’i bërë analizat.
Unë kam këmbëngulur si dajë, i kam dërguar nga spitali i Bulqizës në të Dibrës dhe kërkoj të bëhen analizat në mënyrë të hollësishme. Hedhim poshtë deklaratat e deritanishme për rrjedhje e gazi e çfarë ka dalë”, deklaroi ai.
