Kur krahasohen me ato amerikane, qytetet evropiane mund të konsiderohen si shumë më të sigurta për sa i përket numrit të vrasjeve. Evropa nuk renditet në listën e 50 qyteteve më të dhunshme në botë, bazuar në shkallën më të lartë të vrasjeve.
Edhe qyteti “më vdekjeprurës” në Evropë, ka më pak se një të dhjetën e vrasjeve për 100.000 banorë sesa qyteti amerikan me shkallën më të lartë të vrasjeve. Gjithsesi këto janë 10 qytetet evropiane me shkallën më të lartë të vrasjeve, sipas një raporti të vitit 2019 të Zyrës së OKB-së për Drogën dhe Krimin:
10- Amsterdam, Hollandë
Kryeqyteti i Hollandës, ka një normë prej 2.2 vrasje për 100.000, ose mesatarisht 16 vrasje në vit. Nga shtëpitë e shumta publike, deri tek drogat e legalizuara, turistët e huaj nuk janë të vetmit që e vizitojnë Amsterdamin për të kaluar një natë “mëkatarësh”. Aty shkojnë apo jetojnë edhe shumë eksponentë të krimit të organizuar, nga e gjithë Evropa dhe jo vetëm.
9- Budapest, Hungari
Edhe shkalla e vrasjeve në kryeqytetin hungarez ishte 2.2 vrasje për 100.000 banorë. Policia hungareze raportoi 99 vrasje në vitin 2017. Budapesti, me një popullsi prej rreth 1.75 milionë banorësh, është i njohur për banjot e tij të famshme, dhe quhet nganjëherë edhe “Parisi i Lindjes”. Megjithatë, policia raportoi rreth 62.870 krime të të gjitha llojeve vetëm në vitin 2017.
8-Tampere, Finlandë
Në dallim nga 2 qytetet e para, Tampere është më i vogël. Ai ka një popullsi prej rreth 236.000 banorësh. Megjithatë, ka raportuar një normë të ngjashme prej 2.2 vrasje për 100.000 banorë. Finlanda, ka nivelet më të larta të krimit mes vendeve nordike.
7-Belfast, Irlanda e Veriut
Belfasti, kryeqyteti dhe qyteti më i madh në Irlandën Veriore, ka një shkallë prej 2.4 vrasjesh për 100.000 banorë, ndërsa ka një popullsi prej rreth 300 mijë banorësh. Një studim i botuar në “Irish Times”, zbuloi se shkalla e krimit në Irlandë është vetëm 60 përqind e asaj të Irlandës së Veriut. Studimi zbuloi se krimi në Irlandën e Veriut, ishte 10-fishuar që nga viti 1945.
6-Celje, Slloveni
Qyteti i tretë më i madh në vendin ballkanik, kishte në vitin 2017 një shkallë prej 2.6 vrasje për 100.000 banorë. Megjithatë atë vit, qyteti slloven kishte një popullsi prej vetëm 38.000 banorësh.
5-Debrecen, Hungari
Debrecen, qyteti i dytë më i madh në Hungari pas Budapestit, kishte në vitin 2017 një normë prej 3 vrasje për 100.000 banorë. Një qendër e njohur kulturore e Hungarisë, qyteti ka një popullsi prej 202.000 banorësh.
4-Marsejë, Francë
Një nga qytetet portuale më të populluara përgjatë Deti Mesdhe, Marseja është një ndër qendrat kryesore të trafikut të drogës në Evropë. Ajo njihet si një pikë tranziti, në të cilën heroina trafikohet nga Turqia për në Francë, dhe më pas kalon në SHBA dhe Kanada. Edhe pse një destinacion kryesor turistik, Marseja kishte në vitin 2017 një normë prej 3.5 vrasje për 100.000 banorë. Ajo ka një popullsi prej rreth 860.000 banorësh.
3-Klaipeda, Lituani
Kishte një normë prej 3.9 vrasje për 100.000 banorë në vitin 2017. Po atë vit, niveli i krimeve në Lituani u rrit, pasi vendi balltik forcoi ndjeshëm ligjet kundër drejtimit të makinës në gjendje të dehur. Në vitin 2017, ky qytet kishte një popullsi prej 172.272 banorësh.
2-Vilnius, Lituani
Shumica e krimeve që raportohen në kryeqytetin lituanez, vijnë për shkak të numrit të madh të turistëve. Por vjedhja e parave dhe sendeve të tjera, mbetet kërcënimi më i zakonshëm. Vilnius, kishte gjithashtu një normë prej 3.9 vrasje për 100.000 banorë në vitin 2017. Atë vit kishte një popullsi të përgjithshme prej 697.691 banorësh.
1-Kaunas, Lituani
Në vitin 2017, u rendit si qyteti më vdekjeprurës në Evropë, me një shkallë prej 5.4 vrasjesh në 100.000 banorë. Kaunas, qyteti i dytë më i madh në Lituani, kishte atë vit një popullsi prej rreth 383.764 banorësh. Gjithsesi edhe kjo shkallë, është më pak se një e dhjeta e nivelit më vdekjeprurës të vrasjeve në qytetin amerikan Mo në Sent Ljuis, që kishte një normë prej 60.9 vrasje për 100.000 banorë në vitin 2018.
TIRANA TODAY
