Iva Aliko, në një intervistë për “Bluetooth”, ka folur për përfshirjen e saj në çështjen e “Zogut të Tiranës”. Bukuroshja ka treguar se emri i saj ka dalë në mënyrë indirekte, pasi ajo ka qenë e ftuar në emisionin e tij. E pyetur se sa i është dëmtuar imazhi në lidhje me këtë rrjet prostitucioni, ajo i mëshon fort faktit se nuk ka lidhje me këtë çështje. Fajin ia delegon mediave, pasi sipas saj, i kanë dëmtuar imazhin.
Ndërkohë, emri juaj doli në përgjimet e Zogut të Tiranës, jeni thirrur për të dëshmuar, keni diçka për të sqaruar në lidhje me këtë fakt?
“Emri im nuk doli në përgjimet e Hermesit, e kam sqaruar dhe vazhdoj ta përsëris që emri im ka dalë në mënyrë indirekte, pasi unë kam qenë e ftuar në emisionin e tij dhe pasi mbaroi emisioni e kam lënë te lagjja e tij, te shtëpia e tij. Në momentin që unë lë Hermesin apo këdo tjetër në shtëpinë e tij, nuk është përgjegjësia ime se ku shkon apo kë takon, ashtu siç nuk është përgjegjësi e imja jeta personale e askujt. Unë mbaj përgjegjësi vetëm për veprimet e mia. Emri im u lakua pa pasur lidhje në këtë histori dhe pa qenë emri im në dosje nga përgjimet e Prokurorisë.
Në dosje emri im nuk është lakuar absolutisht për asgjë, përveç faktin që e kam zbritur nga makina ime dhe e kam lënë te lagjja e tij. Kanë qenë portalet, ato që e kanë lakuar emrin tim me tituj të bastarduar, të shtrembëruar vetëm për disa klikime më tepër nga disa pseudogazetarë amatorë dhe joprofesionist (titulli i shtrembëruar, ndërkohë që me brendësi të materialit nuk përputhej asgjë në lidhje me titullin). Për të dëshmuar nuk jam thirrur, pasi nuk kam asnjë përfshirje tek ajo dosje”.
A do ta quanit rrjet prostitucioni atë që ndodhte në Tiranë, ju personalisht ishit e përfshirë?
“Nuk e di. S’kam çfarë flas, pasi nuk kam asnjë lidhje me këtë çështje, pasi vazhdoj të jem akoma e shokuar me çfarë kam lexuar në lidhje me atë rrjet”.
Keni folur me Hermesin, si po e përballon burgun?
“Jo, nuk kam folur me Hermesin që nga momenti që ndodhet në paraburgim”.
Mendoni se emri juaj në këtë çështje ju ka dëmtuar?
“Jo, emri im nuk është i përfshirë fare në këtë çështje, as nga policia, as nga Prokuroria. Po të kisha lidhje në këtë çështje, të jeni të sigurt që as policia, as Prokuroria nuk do më kishin kursyer as mua. Emrin tim e kanë dëmtuar portalet me titujt e tyre të shtrembëruar”.
