Gjykata Europiane ka dënuar Shqipërinë, se nuk ka psikiatri për të dënuarit. Këtu i referohet rastit të sulmit me thikë ndaj mjekut të njohur Ali Refatllari në vitin 2008. Arben Strazimiri qëlloi me thikë mjekun, për t’u hakmarrë për vdekjen e të afërmit të tij gjatë një operacioni nga mjeku Refatllari. Ndonëse kreu një krim dhe u dënua për të, Shqipëria duhet t’i paguajë Arben Strazimirit 15 mijë euro, kjo në formë dëmshpërblimi për trajtim jo njerëzor në burg.
Vendimi është dhënë nga Gjykata e Strasburgut së fundmi dhe është zbardhur sot. Ku i kërkohet shtetit shqiptar të dëmshpërblejë Strazimirin, për shkak se dënimin për krimin ndaj Refatllarit ai e kreu në një burg dhe jo në një spital psikiatrik siç kishte kërkuar.
Si nisi historia
Historia nis gjatë gjyqit ndaj Strazimirit, ku ai kërkoi që të trajtohej në një spital psikiatrik, duke pretenduar se kishte probleme psiqike. Por gjykata nuk e ka marrë parasysh këtë kërkesë, duke vendosur që dënimin ta kryejë në një burg normal.
Pas këtij vendimi, Strazimiri e ka çuar çështjen në Gjykatën Europiane të të Drejtave të Njeriut, duke fituar atje kundër shtetit shqiptar.
Pas bërjes së verifikimeve, gjykata ka konstatuar se Shqipëria nuk ka institucione të posaçme ku mund të vuajnë dënimin persona me probleme psiqike, raporton “abcnews”. Dërgimi i tyre në burg, sipas gjykatës, është një shkelje e të drejtave të njeriut, ç’ka bëri që ta dënojë Shqipërinë me 15 mijë euro, të cilat duhet t’i paguhen Arben Strazimirit.
