Kryeministri në detyrë i Kosovës, Ramush Haradinaj, ka reaguar në lidhje me lajmet që kanë spekuluar mbi të në media.
Mediat kosovare raportuan se polici i cili dyshohet se ekzekutoi një qytetar sot në Gjilan, ishte pjesë e ekipit të mbrojtjes së afërt të Haradinajt.
Përmes një postimi në Facebook, Haradinaj i hodhi poshtë këto pretendime, duke mohuar zërat se polici i përfshirë në këtë ngjarje të ketë qenë pjesë e mbrojtjes së tij.
Postimi i plotë:
Qëndrimi i palëkundur kundër ndarjes së Kosovës dhe kundër pazareve të errëta të këmbimit të territoreve, po vazhdon t’i pengoj shpifësve dhe propaganduesve, që në emër të informimit, qëllimshëm shpërndajnë dezinformata dhe të pavërteta, duke etiketuar emrin tim.Përkundër që ne e dënuam vrasjen e një qytetari nga ana e një polici, bëmë thirrje për organet e rendit që të ndërmarrin veprimet e nevojshme ligjore dhe sqaruam që polici në fjalë, asnjëherë nuk ishte pjesë e ekipit tim të mbrojtjes së afërtë, disa mediume, të shtyrë nga propaganda e politikës së ndarjes, vazhdojnë ta etiketojnë dorasin si person të afërtë me emrin tim.As kjo përpjekje dhe as njollosjet e mëhershme dhe as të tjerat që mund të vijnë, nuk do të na ndalin, që në çfarëdo detyre institucionale, ta mbrojmë Kosovën nga copëtimi dhe nga pazaret e një grusht profiterësh.Kosova do të jetë ajo e 17 Shkurtit, për të cilën dhanë jetë luftëtarët tanë, sakrifikuan nënat dhe familjet tona, intelektualët tanë dhe çdo shqiptarë!
