Në një dalje publike për mediat, Sekretari i Përgjithshëm i Partisë Demokratike, Gazment Bardhi, ka vënë në dyshim integritetin e SPAK-ut. Megjithatë, dyshimet ai ja ka fatuar mediave online, nisur nga dy precedentë. Një dokument i viteve 1990, ku Kraja ka marrë pjesë në një hetim politik dhe një foto që qarkullon prej ditës së djeshme të deputetit Ulsi Manja me kreun kandidatin për kreun e SPAK-ut Altin Dumani.
“Një dokument i Korrikut 1990, i bërë viral ditën e djeshme, ka zbuluar se Drejtuesi i SPAK-ut, Arben Kraja, ka marrë pjesë në procese politike, duke i shërbyer regjimit diktatorial deri në grahmat e tij të fundit. Partia Demokratike ka bindjen se një ushtar i diktaturës më të egër në Europë, që dënon qytetarët me motivacionin “për dëmtim të moralit komunist”, nuk mund të jetë shërbëtor i shtetit të së drejtës. Përveçse një hetues i diktaturës, drejtuesi i SPAK-ut, Arben Kraja, është propozuar nga PS si zëvendëskryetar i KLSH dhe ka punuar në Kryeministri për qeverinë e PS”, tha Bardhi.
Pasi ka sqaruar detajet për dokumentin, Bardhii ka ngritur një tjetër linjë dyshimi, foton e Dumanit me Ulsi Manjën. “Fakti i dytë i rëndë, edhe ky i bërë publik nga media online, është takimi një ditë para votimit i prokurorit Altin Dumani me përfaqësuesin e Partisë Socialiste, Ulsi Manja”. Sipas tij, këto dy elementë minojnë besimin e SPAK-ut.
“Altin Dumani ishte një nga kandidatët kryesorë për drejtimin e SPAK dhe ky takim, siç analizon me të drejtë media, për të marrë në KLP votat e kontrolluara nga njëri prej klaneve në Partinë Socialiste, vendos në pikëpyetje profesionalizmin, pavarësinë dhe paanshmërinë e tij. Minimalisht prokurori Dumani ka detyrimin t’i sqarojë opinionit publik motivin e takimit me Ulsi Manjën, një ditë përpara votimit në KLP”, shtoi Bardhi.
