Avokatja e Popullit Erinda Ballanca e konsideron sistemin në drejtësi të “paralizuar”, edhe pse kanë kaluar tre vite nga miratimi i paketës së ndryshimeve. “Ne rezultojmë të jemi më keq se kemi qenë para se kjo reformë të implementohej”, u shpreh Ballanca.
E ftuar këtë mbrëmje në emisionin “Provokacija”, ajo theksoi se rezultatet e para të Reformës në Drejtësi do të jenë të prekshme pas 7-8 vitesh.
“Në momentin e parë reforma ishte e kërkuar dhe e shumë pritur nga populli shqiptar por edhe nga profesionistët. Në momentin që është kërkuar reforma unë nuk kam qenë në këtë pozicion, por realisht kisha kërkesën se duhet të kishte një ndryshim në sistemin e drejtësisë. Në momentin që u miratua reforma të gjithë mendonin do të kishte një periudhë që do të duhej të tundej dhe shkundej mirë nga rrënjët për të liruar një sistem të ri drejtësie, ajo që ne prisnin, gjyqtarë të pakorruptuar, të zotë.
Unë mendoj se ne jemi shumë afër të mospasjes fare të një sistemi të drejtësisë dhe ky është një shqetësim shumë i madh në gjykimin tim. Ne kemi një sistem që është në mos themi paralizuar ende pas tre vitesh që është miratuar paketa e ndryshimeve. Ne rezultojmë të jemi më keq se kemi qenë para se kjo reformë të implementohej. Ndoshta mendoj unë pas 7 apo 8 vitesh ne do arrijmë në ato rezultatet e para”, deklaroi Ballanca.
