Kreu i Autoritetit të Komunikimeve Elektronike dhe Postare Ilir Zela ka dhënë dorëheqjen nga drejtimi i këtij institucioni.
Rreth dy vite nga marrja e detyrës, Zela njofton dorëheqjen përmes një letre drejtuar kreut të Kuvendit Gramoz Ruçi.
Në letrën drejtuar kryeparlamentarit Ruçi, Zela thotë se i ka shërbyer publikut me përkushtim dhe se në asnjë moment nuk ka lejuar që interesat publike të nëpërkëmben nga presioni i pandërprerë i interesave monopoliste.
Gjithashtu në letër, Zela thotë se ka dhënë dorëheqjen edhe si anëtar i këshillit mbikëqyrës të AKEP.
“Prej datës, 22 nëntor 2017 kam pasur privilegjin që me besimin dhe mbështetjen e plotë të Kuvendit të Republikës së Shqipërisë t’i shërbej publikut në detyrën e Kryetarit të Këshillit Drejtues të Autoritetit të Komunikimeve Elektronike dhe Postare (AKEP).
Me paqen e njeriut që i ka shërbyer publikut me përkushtim shembullor, në këtë detyrë apo në angazhime publike të mëhershme, pa lejuar në asnjë moment që interesat publike të nëpërkëmben nga presioni i pandërprerë i interesave monopoliste, ju njoftoj dorëheqjen time nga detyra e Kryetarit të Këshillit Drejtues të AKEP”, shkruan Zela në letrën e dorëheqjes së tij.
