Kolegji i Posaçëm i Apelit (KPA) ka pushuar shqyrtimin e çështjes për ish-gjyqtaren Marsida Xhaferllari.
Anëtarja e Gjykatës Kushtetuese, Xhaferllari kishte kërkuar vetë vlerësimin nga KPA-ja, pasi ajo kaloi edhe procesin e vettingut në Komisionin e Pavarur të Kualifikimit. Duke u emëruar anëtare e GJK-së, Xhaferllari ka humbur statusin e gjyqtares e për pasojë nuk mund të vazhdojë procedurat.
Kujtojmë se ajo është dekretuar si anëtare e GJK nga presidenti Meta. Ky vendim nuk është mirëpritur nga qeveria e cila kërkon vënien e Arta Vorpsit në këtë pozicion.
Njoftimi i KPA:
Trupi gjykues i Kolegjit të Posaçëm të Apelimit, i përbërë nga Ardian Hajdari kryesues, Ina Rama relator, Natasha Mulaj, Rezarta Schuetz, Sokol Çomo anëtarë, shpalli vendimin për çështjen (JR) nr.29/2019, datë 30.05.2019, për ankimin e subjektit të rivlerësimit Marsida Xhaferllari, kundër vendimit nr. 115, datë 11.03.2019 të Komisionit të Pavarur të Kualifikimit.
Në përfundim të gjykimit në dhomë këshillimi, trupi gjykues, bazuar në nenin 4 pika 6 e ligjit nr. 84/2016 “Për rivlerësimin kalimtar të gjyqtarëve dhe prokurorëve në Republikën e Shqipërisë” dhe në nenet 451 germa “b” e nenit 463 të Kodit të Procedurës Civile, me shumicë votash, vendosi:
Pushimin e shqyrtimit të çështjes në Kolegjin e Posaçëm të Apelimit që i përket ankimit të subjektit të rivlerësimit Marsida Xhaferllari kundër vendimit nr. 115, datë 11.03.2019 të Komisionit të Pavarur të Kualifikimit, për shkak të tërheqjes së ankimit.
Të deklarojë marrjen e formës së prerë të vendimit nr. 115 datë 11.03.2019 të Komisionit të Pavarur të Kualifikimit që i përket subjektit të rivlerësimit Marsida Xhaferllari.
Ky vendim është përfundimtar dhe ka efekt të menjëhershëm
