Në mbledhjen e sotme të Komisionit të Ekonomisë u diskutua për koncesionet dhe PPP. Kreu i Komisionit, Arben Ahmetaj ka shpjeguar dhe qartësuar procesin e tenderimit dhe përzgjedhjen e ofertave.
Po ashtu, Ahmetaj krahasoi koncesionet në kohën kur në pushtet ishte forca demokratike, teksa solli në vëmendje Rrugën e Elbasanit. “Çfarë ndodhi me Rrugën e Elbasanit, shifra kërceu nga 150 në 246 milionë. Dhe më pas ndodhi që projekti nuk ishte i saktë dhe u rrëzua gjithë pjesa e kodrës, ra. Filluan historitë, shkuan 100+”.
“Një projekt ka zanafillën në ligj me dy mënyra, një është ofertë e pakërkuar, ku sektori privat bën hanin e parë përpara dhe prezanton një projekt, dhe mënyra tjetër është oferta e kërkuar, ku qeveria bën hapin e parë dhe kërkon. Të dyja kalojnë në proces tenderimi, sepse ka pas një tymnajë për koncesionet pa tender. Oferta e pakërkuar pranohet, pasi studiohet.
Të gjitha ofertat filtrohen. Për një rrugë merret dosja dhe çohet tek Autoriteti Kombëtar i Rrugëve, që jep gjykimin teknik. Të gjitha çmimet janë në bazë të manualit, mund ta verifikoni. Asnjë çmim nuk është mbi manualin. Në këtë moment hidhet në tender për këdo dhe marrin pjesë kushdo. Ai që ka bërë ofertën e pakërkuar, ka bonusin, që e gjykon autoriteti dhe e vendos me VKM.
Pse vendoset kjo rrugë dhe jo një tjetër? Hapi i parë është kur ministri përgjegjës shkon në Komunitetin e Investimeve Strategjike. Bën prezantimin dhe thotë se ka “X” ofertë. Edhe vetë ministri mund të thotë pse kjo e rrugë e jo një tjetër. Bëhet një debat në Këshillin e Investimeve. Në momentin që vendoset nga Këshilli i Investimeve që ky projekt të merret në vëmendje, vijojnë procedurat e mëtejshme”, sqaroi Ahmetaj.
E pranishme në komision ishte dhe ministrja e Financave, Anila Denaj.
