Nga Anxhela Ferra
Në Pallatin e Kongreseve është duke u mbajtur edicioni i 22-të i Panairit të Librit. Eventi ka filluar në datën 13 nëntor dhe do të zgjasë deri në 17 nëntor. I konsideruar si një nga evenimentet kryesore të promovimit të dijes, në të janë mbledhur rreth 100 stenda ekspozuese. Janë të shumtë njerëzit që hyjnë dhe dalin, disa kanë në duar çanta të mbushura me botime të reja për bibliotekën e tyre.
Dhe të tjerë zgjedhin veçse ta vizitojnë. Për pesë ditë me radhë në sallën ovale të Pallatit të Kongreseve, njerëz të thjeshtë, studentë, personazhe publikë mblidhen në një vend. Një nga personazhet që e viziton çdo vit Panairin e Librit është edhe bashkëshortja e kryeministrit, Linda Rama. E cila në një prononcim për Tirana Today thotë se është e nevojshme të shtohen panairet për librin. Si edhe duhet të bëhet një përzgjedhje më e kujdesshme e titujve.
“Panairi është plot, edhe tituj ka shumë. Por, unë mendoj se një panair në vit nuk mjafton, duhet më shumë. Dhe e dyta do ta shihja më shumë një panair të dytë apo të tretë, nëpër periferi të Tiranës. Mbase kjo do të nxiste disi edhe kërkimin më të strukturuar të librave dhe të titujve që përzgjidhen. Pasi ka shumë tituj komercialë, nuk jam në gjendje të them cilët, pasi nuk i lexoj vetë. Dhe mbase është i vetmi rast ku mund të them që interneti dhe të gjithë ata që e përdorin të lënë pak hapësirë edhe për ata që mund të mos jenë shumë të fokusuar te interneti. Por, librat e tyre vlejnë shumë. Pra, ta mendojnë këtë, që hapësira nuk duhet të jetë vetëm për ta. Gjithmonë është mirë të lexosh, por është shumë e rëndësishme që të kultivohesh dhe të përzgjedhës sepse janë shumë tituj.”
Dyndje te Panairi i librit/Bejtja: Shqipëria do ishte më e mirë nëse do lexonin
Zonja Rama tregon se një nga librat që ka blerë ishte edhe libri i gazetarit Andi Bejtja. Dhe përzgjedhjen e librave që bën për bashkëshortin.
“Unë ndalova te Mitrush Kuteli, aty mora diçka. Bleva librin e Andi Bejtjas, ku mora dhe një autograf. Dhe librin e Ornela Vorpsit, sepse kam kuriozitet si ka ardhur në shqip. Zaho ishte më parë te Panairi por nuk mund të qëndronte gjatë sepse kishte shumë njerëz. Ai zgjodhi dy-tre libra të vetët si Harry Potter. Ndërsa, me Edin është më ndryshe. Sigurisht që secili zgjedh librat e vetë, kemi dhe libra të përbashkët. Dhe mendoj se i njohim shumë mirë pasionet e njëri-tjetrit ndaj kurdo herë që shohim libra që mendojmë se i pëlqejnë, i blejmë. Librat janë të bibliotekës së familjes tani dhe ne e vizitojmë njëri-tjetrin në librat e bibliotekës.”/ TIRANA TODAY
