Plas konflikti brenda Partisë Demokratike. Ashtu siç gazeta e deklaroi para disa ditësh se ish-kryeministri Sali Berisha është zhgënjyer me strategjinë e kryetarit të PD, Lulzim Basha, ditët e fundit përplasjet mes tyre kanë arritur kulmin. Burime shumë të sigurta të gazetës, i pohuan gazetës se dy ditë më parë ish-kryeministri Berisha dhe kryedemokrati Basha kanë pasur përplasje sa i takon aksionit opozitar dhe protestës së banorëve të Astirit. Sipas burimeve, mësohet se banorët e kanë vënë në dijeni selinë blu se Inspektorati Kombëtar i Mbrojtjes së Territorit do të ndërhynte dje herët në mëngjes për të shembur banesat e tyre. Por Basha, duket se nuk e ka vënë ujin në zjarr dhe për rrjedhojë asnjë nga zyrtarët e partisë së tij nuk u pa dje në terren në krah të banorëve, duke i braktisur ata. Madje, lideri demokrat u pa dje krah banorëve vetëm në Spitalin e Traumës, disa orë pasi ata ishin përplasur me policinë dhe kishin shkuar në spital për të marrë ndihmën e parë mjekësore. Por ky distancim i Bashës deri diku ishte i paramenduar, vendim ky që ka detyruar Berishën t’i kërkojë atij llogari.
Berisha akuzon Bashën për braktisje të qytetarëve
Sipas informacioneve mësohet se ish-kryeministri Sali Berisha ka akuzuar kryetarin e Partisë Demokratike, Lulzim Basha se ka braktisur banorët e Astirit dhe kauzën e tyre, njësoj sikundër veproi me banorët e Kukësit disa muaj më parë gjatë qëndresë së tyre kundër qeverisë për taksën në Rrugën e Kombit. Mësohet se Berisha i ka kërkuar Bashës që dje të dilte në mbështetje të banorëve të Astirit, por kryedemokrati nuk ka pranuar duke thënë se dhuna nuk është zgjidhja, ndërsa ka premtuar se kur të vijë në pushtet do t’i dëmshpërblejë banorët. Megjithatë, ky qëndrim i liderit demokrat ka rritur zemërimin tek ish-kryeministri, teksa mësohet se ky i fundit ka akuzuar Bashën se ka braktisur gjithashtu edhe kauzën e opozitës dhe aksionin opozitar, sikundër janë protestat kundër qeverisë. Madje, të njëjtat burime theksuan se përplasja verbale mes Bashës dhe Berishës ka qenë e fortë, sa ish-kryeministri e ka akuzuar kreun e PD se braktisi protestat, pasi po flirton me kryeministrin Edi Rama në kurriz të demokratëve. Megjithatë, mësohet se Berisha i ka kërkuar Bashës që të reflektojë dhe të mos shkojë drejt një pakti të dytë me Ramën si ai i 17 majit të dy viteve më parë, pasi kjo do të rezultonte fatale për kryedemokratin. Thënë ndryshe, mësohet se Berisha ia ka bërë të qartë Bashës se do t’ia mbyllë derën Partisë Demokratike dhe se do të mobilizojë përkrahësit e tij për ta rrëzuar atë nga partia, nëse nuk rrit dozën e reagimit ndaj mazhorancës qeverisëse dhe nuk thërret qytetarët në protestë.
Media pranë LSI nisin sulmet ndaj Bashës
Por përveç ish-kryeministrit Sali Berisha, presionet ndaj kryetarit të Partisë Demokratike, Lulzim Basha janë rritur edhe nga media pranë Lëvizjes Socialiste për Integrim, sidomos ato pranë presidentit Ilir Meta. Ditën e djeshme këto media i kanë kërkuar llogari kryedemokratit Basha se përse i braktisi banorët e Astirit. Madje, këto media kanë shkuar deri atje duke shkruar se ndihen të zhgënjyer nga mënyra se si po bën opozitë Basha dhe se opozita me në krye shefin e selisë blu duhet të ishin dje në krah të banorëve të Astirit, duke bërë rezistencë ndaj policisë dhe iu përgjigjur me të njëjtën monedhë dhunës së ushtruar nga uniformat blu. Thënë më troç, media pranë presidentit Meta kërkonin që dje në zonën e Astirit të kishte dhunë dhe kaos dhe jo sehir, sikundër bëri opozita, duke shkuar pranë banorëve disa orë, pasi IKMT kishte ndërhyrë, duke shembur plot shtëpi. /Gazeta SOT
