Pas shpëtimit të 11-vjeçarit Alvin Berisha nga kampi Al-Hol, nënkryetarja e Komisionit të Integrimit, Senida Mesi shprehet se ky rast ka nxjerrë në dritë situatën me shqiptarët që ndodhen në kampet e Sirisë.
Teksa ishte e ftuar në “A2CNN”, Mesi theksoi se qeveria i ka në vëmendje individët që janë rekrutuar për të luftuar në Siri, por, sipas saj nuk janë raste që duhen bërë publike.
“Nuk e pranoj që shteti shqiptar nuk është i ndjeshëm me këto raste. Në kampin Al-Hol ndodhen shumë individë që janë rekrutuar në mënyrat nga më të çuditshme për të luftuar atje. Qeveria i ka vëmendje, por nuk janë raste që duhen bërë publike, pasi të gjithë ata që ndodhen aty mund të kthehen nga terroristët atje në subjekt. Raste të tilla duhen trajtuar me diskrecionin më të madh.
Duhet patur vëmendje te parandalimi i rasteve të tilla, parandalimi i radikalizmit. Askush nuk ka shkuar me detyrim, por me dëshirën për të shërbyer për diçka. Rikthimi është i vështirë dhe duhen kaluar disa procedura, në mënyrë që këta individë të riintegrohen dhe të kthehen ata që ishin para se të shkonin në ato kampe”, deklaroi Mesi.
E pyetur nëse shteti shqiptar ka informacion për shqiptarët që ndodhen në Siri, Mesi u përgjigj: “Është një vend që nuk ka shtet që të komunikosh me institucione. Sigurisht që qeveria ka informacion, por nuk mund të them a është 100% i plotë”.
