Ish-deputetja demokrate Oriola Pampuri, në një prononcim për “Tirana Today”, ka konfirmuar se një prej banorëve të “Unazës së Re” është në gjendje të rëndë. Ajo përgënjeshtroi lajmin që qarkulloi në media, se personi në fjalë ka ndërruar jetë, një dëshmi e marrë fillimisht nga banorët e zonës.
Por pas një kontakti me mjekët, ata i kanë konfirmuar znj. Pampuri se personi në fjalë, është në ‘luftë’ me jetën.
Që prej mëngjesit të sotëm, IKMT të mbështetur nga policia, kanë nisur aksionin për shembjen e banesave te zona e “Astirit”. Aksioni është kundërshtuar nga banorët, të cilët janë përplasur me policinë, duke shkaktuar të plagosur nga të dyja palët.
Policia Rrugore e Tiranës ka bllokuar përkohësisht lëvizjen në të dy krahët e “Unazës së Re”, deri në përfundim të aksionit të IKMT për shembjen e disa objekteve, që do t’i hapin rrugë projektit të ri.
Në njoftim, policia sqaron se ky devijim bëhet për të shmangur rrezikun gjatë lëvizjes në këtë aks, ku po punohet me mjete të rënda.
