Bashkëkryetari i Komisionit të Reformës Zgjedhore, Damian Gjiknuri ka folur pas mbledhjes ku u diskutua mbi propozimet e ekspertëve që synojnë depolitizimin e KQZ-së.
Në një konferencë për mediat, Gjiknuri u shpreh se mirëpret çdo lloj propozimi nga Partia Demokratike.
“Natyrshëm PD është pjesë integrale e këtij komisioni pavarësisht se s’merr pjesë. Ky është proces i hapur e transparent, diskutimet e draftet i vihen në dispozicion publikut”, deklaroi Gjiknuri.
Ndër të tjera, ai shtoi se fenomeni kriminal i shit-blerjes së votës nuk parandalohet nga kodi zgjedhor, por mund të luftohet vetëm me politika penale.
“Natyra ka bërë që të ketë edhe njerëz që shkelin ligjin. Kjo bëhet me proces transparent. Shit-blerjen e votave e lufton vetëm procesi penal kur ka raste hetimet të bëhen në kohë, si çdo krim tjetër edhe krimi zgjedhor luftohet me politikë të luftës kundër krimit nga institucionet e ngarkuara nga ligji. Të mos i kthejmë zgjedhjet në mollë sherri”, u shpreh deputeti.
