Ambasada amerikane ka reaguar në lidhje me implementimin e rrjetit 5G në Shqipëri.
Përmes një postimi në Facebook, ambasada thekson se disa media nuk e kanë pasqyruar si duhet këtë ngjarje. Ambasada akuzon mediat se kanë synuar të shtrembërojnë politikën e SHBA-ve për rrjetin 5G.
“Faktet kanë rëndësi. ‘Gazetaria’ shkel e shko dhe çorientuese, që synon të shtrembërojë politikën e Shteteve të Bashkuara të Amerikës për rrjetin 5G, nuk e ndryshon të vërtetën. Faktet janë këto: Shtetet e Bashkuara e mbështesin qasjen e matur dhe të përgjegjshme të Shqipërisë për rrjetin 5G. E Ngarkuara me Punë, a.i. Leyla Moses-Ones e tha këtë javën e kaluar në Konferencën “Politika e Sh.B.A. në Ballkanin Perëndimor”: “Shqipëria tashmë po bën gjënë e duhur duke ushtruar vigjilencë në mbrojtje të rrjeteve të saj. Edhe një herë, disa gjëra në Shqipëri thjesht nuk janë për shitje”, shkruhet në postimin e ambasadës amerikane.
Kujtojmë se ditën e djeshme pati polemika për këtë çështje. Sipas zërave që qarkulluan, futja e rrjetit 5 G nga Kina, mund të përbënte kërcënim për sigurinë kombëtare të Shqipërisë. Procedurat për implementimin e rrjetit 5G në Shqipëri do të nisin në 2020.
