Ministrja e Drejtësisë, Etilda Gjonaj shprehet se institucioni që ajo drejton i janë shtuar 62 milionë e 500 mijë lekë investime të brendshme.
Në fjalën e mbajtur në Kuvend, Gjonaj deklaroi se gjatë vitit 2019 pagat e punonjësve u rritën me 7%, teksa theksoi se kjo është rritja e parë që bëhet pas shumë vitesh.
Sipas saj, për shkak të rritjes së kërkesës për realizimin e investimeve prej 429 milionë të akorduara për vitin 2019 për Drejtorinë Burgjeve është bërë e mundur përmirësimi i kushteve dhe rritja e sigurisë.
“Me këtë akt normativ që po diskutojmë sot “Mbi rishikimin e ligjit të buxhetit të vitit 2019” në total Ministrisë së Drejtësisë i janë shtuar 62 milionë e 500 mijë lekë investime të brendshme. Duke rialokuar dhe mirëmenaxhuar një pjesë të shpenzimeve korente të pashpenzuara kjo falë edhe mirëmanxhimit që ju është bërë fondeve.
Gjatë vitit 2019 pajisëm pas 10 vitesh personelin policor të burgjeve me uniformë. 3.559 punonjës policie. Po ashtu pagat e punonjësve të Policisë së Burgjeve për vitin 2019 janë rritur me 7% ose rreth 181 milionë lekë. Dëshiroj të theksoj se kjo është rritja e parë që ju bëhet pas kaq shumë vitesh”, u shpreh Gjonaj.
