Ambasadori i Iranit në Britani të Madhe, Hamid Baeedinejad ka publikuar së fundmi një foto në profilin e tij në “Twitter”, për të cilën pretendon se është kapur brenda kampit të muxhahedinëve në Tiranë.
Krahas fotos, ambasadori hedh akuza ndaj muxhahedinëve se po përdorin “super kompjutera”, me qëllim që të shpërndajnë lajme të rreme ndaj Republikës Islamike të Iranit.
“Anëtarët e MKO në kampin Ashraf, në Shqipëri, po përpiqen të përdorin një tip të ri arme kundër Iranit. Armët e tyre përfshijnë super-kompjutera me të cilët ata po përpiqen të shpërndajnë gënjeshtra dhe lajme të rreme për të helmuar opinionin publik”, shkruan Baeedinejad.
Si rezultat i një marrëveshjeje mes qeverisë shqiptare dhe asaj të SHBA-ve, në Shqipëri strehohen rreth 3000 muxhahedinë. Këta të fundit konsiderohen nga Irani “terroristë”.
