Identifikohet personi që dha alarmin për bombë në makinën e gjyqtarit Markeliano Kuqi më herët ditën e sotme.
Sipas “BalkanWeb”, autori i telefonatës së rremë që u identifikua nga policia me inicialet N.B., është shtetasi Neim Behari.
Ky shtetas kishte telefonuar policinë nga ambientet e IEVP-së, duke pretenduar se në mjetin e gjyqtarit Markeliano Kuqi, ishte vendosur lëndë e dyshuar plasëse, e cila nuk u konstatua gjatë kontrollit të ushtruar.
Njoftimi i policisë:
Identifikohet dhe procedohet autori i telefonatës së rreme të kryer sot tek organet e rendit, sipas të cilës, në mjetin e një gjyqtari ishte vendosur lëndë plasëse.
Specialistët e Seksionit për Hetimin e Krimeve, në Komisariatin e Policisë Korçë, në vijim të punës për zbardhjen dhe dokumentimin e ngjarjes së ndodhur më datë 15.10.2019, referuan materialet shtesë pranë Prokurorisë të Rrethit Gjyqësor Korçë, në ngarkim të shtetasit:
N.B, 34 vjeç, banues në Lapardha, Berat (i cili aktualisht vuan dënimin në IEVP-Drenovë, për veprën penale “Vrasja”).
Gjatë kryerjes së veprimeve hetimore rezultoi se ky shtetas, kishte telefonuar Policinë nga ambjentet e IEVP-së, duke pretenduar se në mjetin e gjyqtarit M.K, ishte vendosur lendë e dyshuar plasëse, e cila nuk u konstatua gjatë kontrollit të ushtruar.
Materialet i kaluan Prokurorisë pranë Gjykatës së Shkallës së Parë Korçë për veprime të mëtejshme.
