“Qendra e Solidaritetit” është një nga projektet më të mëdha dhe më ambicioze. Me qëllimin për t’i qenë pranë njerëzve në nevojë, fondacioni “Fundjavë Ndryshe” synon të sjellë ndryshime rrënjësore në shoqëri. “Qendra e Solidaritetit” do të jetë edhe qendra më e madhe sociale në Ballkan.
Teksa, projekti është konceptuar të përfundojë i gjithi në vitin 2021, punimet janë duke avancuar shumë shpejt. Drejtuesi i “Fundjavë Ndryshe”, Arbër Hajdari, ka bërë me dije nëpërmjet rrjeteve sociale se në datën 27 tetor do të bëhet dhe inaugurimi i fazës së parë të projektit, i cili është përfunduar në kohë rekord, për 4 muaj. Kjo datë përkon edhe me 4-vjetorin e themelimit të fondacionit “Fundjavë Ndryshe”.
Edhe pse në fokus janë njerëzit në nevojë dhe shtresat e varfra, “Qendra e Solidaritetit” do të jetë për të gjithë. Kjo pasi në të do të ndërtohen shkollë profesionale, bibliotekë, salla konferencash dhe trajnimesh, kapanon magazinimi, e një sërë shërbimesh të reja. Në këtë mënyrë do t’iu shërbejë edhe të rinjve të cilët do të kenë edukimin falas, gjithashtu do t’iu jepet dhe mundësi punësimi.
Projekti është duke u ndërtuar në disa mjedise të ish-uzinës së artilerive në nisje të Rrugës së Arbrit. Dhe është i mbështetur nga shumë biznese, e njerëz të thjeshtë. Të gjithë me një qëllim të madh, të ndihmojnë e ndryshojnë jetën e shumë familjeve në nevojë./ TIRANA TODAY
