Kryeministri i Republikës së Maqedonisë së Veriut, Zoran Zaev dhe ish-Ndihmësi i sekretarit amerikan të Shtetit për Evropë dhe Euroazi, Wess Mitchell, kanë hapur samitin për Ballkanin Perëndimor në ngjarjen e organizuar nga revista javore “The Economist”. Agjensia Anadolu Agency raportoi se në samitin me temë “Përforcimi i momentit për integrimin evropian”, kryeministri maqedonas, tha se Maqedonia e Veriut është në pritje të lajmeve të mira, duke përmendur anëtarësimin në NATO dhe fillimin e bisedimeve për anëtarësim në Bashkimin Evropian.
Duke folur për Marrëveshjen e Prespës, me të cilën u zgjidh çështja e emrit mes Maqedonisë së Veriut dhe Greqisë, Zaev tha se ajo është edhe një “katalizator i ndryshimeve pasi dëshmon për një proces të ri transformues në Ballkan”.
“Rajoni ballkanik stabil është në interes të Bashkimit Evropian, posaçërisht në aspektin gjeopolitik, ekonomik dhe të sigurisë. Bashkëpunimi më i afërt me vendet anëtare të Bashkimit Evropian ndihmon në ballafaqimin me sfidat që janë kyçe për axhendën evropiane, siç janë ndryshimet klimatike, energjetika, mjedisi jetësor, siguria dhe emigrimet”, tha Zaev.
Ish-zyrtari amerikan Ëess Mitchell vuri në dukje “efektin ei demonstrimit” që krijon marrëveshja e Prespës për Gadishullin Ballkanik, duke u shprehur se kjo dëshmon që Ballkani “po lëviz drejt Perëndimit”.
“Realiteti është se në shumë pjesë të Ballkanit sot, fuqia dhe ndikimi po largohen nga Perëndimi drejt lojtarëve të jashtëm, mënyrat e qeverisjes dhe ekonomisë së të cilëve janë shumë të ndryshëm nga ata që ne kemi dëshiruar të kenë shtetet e këtij rajoni që nga vitet e 90-ta. E ardhmja që synohet nga Rusia dhe Kina për Ballkanin Perëndimor, nuk është një e ardhme me liritë individuale dhe tregje të lira, por e ardhme me varësi dhe shfrytëzim”, tha Mitchell.
Ndërsa ish-kryeministri i Greqisë, Alexis Tsipras, tha se BE-ja duhet të fillojë bisedimet për anëtarësim me Maqedoninë e Veriut, duke shtuar se BE-ja duhet të promovojë paqe dhe stabilitet në Ballkan.
