Presidenti amerikan Donald Trump deklaroi të dielën se kërkon që të takojë personin që bëri publik skandalin me Presidentin ukrainas, Volodymyr Zelensky.
Me këtë të fundit Trump ka zhvilluar një bisedë telefonike në të cilën aludohet se i ka kërkuar të hetojë rreth rivalit të tij politik, Joe Biden, i cili kryeson garën e demokratëve si kandidat presidencial për zgjedhjet e vitit 2020.
“Si çdo amerikan unë e meritoj një takim me akuzuesin tim, veçanërisht këtë akuzues, i cili e paraqiti një bisedë të përkryer me një lider të huaj në një mënyrë tërësisht të gabuar dhe mashtruese”, shkroi Trump në Twitter para se ta sulmonte shefin e Komisionit për Inteligjencë, Adam Schiff.
Kryetarja e Dhomës së Përfaqësuesve Nancy Pelosi ka theksuar se dhoma e kontrolluar nga demokratët do të shqyrtojë nëse Zoti Trump ka kërkuar ndihmën e Ukrainës për të hedhur baltë mbi ish-nënpresidentin Joe Biden, apo jo.
Nën presion është edhe ministri i Jashtëm Mike Pompeo, të cilit i është kërkuar që të dorëzojë brenda një jave dokumentet e kërkuara për rastin në fjalë. Po ashtu janë thirrur për të dhënë dëshmi edhe 5 zyrtarë të Departamentit të Shtetit, ndër ta edhe ambasadorja amerikane në Ukrainë, Marie Yovanovitch.
