Protestuesit anti-qeveritarë në Serbi u mblodhën të shtunën para Universitetit të Beogradit në tubimin e 43-të me radhë, këtë herë për shkak të dyshimeve se ministri i financave, Sinisa Mali, ka bërë plagjiaturë në mbrojtjen e doktoraturës. Studentët po kërkojnë qe prej 12 ditësh që të bëhen publike gjetjet e një këshilli universitar në lidhje me rishikimin e doktoraturës së ministrit. Në maj të këtij vitit, Këshilli arriti në përfundimin se teksti i diplomës së ministrit nuk e arrin shkallën e plagjiaturës.
Presidenti i Serbisë, Aleksandar Vuçiq, tha se nuk do t’i plotësojë kërkesat e tyre edhe nëse pesë milionë njerëz dalin në rrugë. Zoti Vucic, madje u tall me protestat edhe gjatë bisedës me gazetarët në selinë e Kombeve të Bashkuara në Nju Jork, duke thënë “Rroftë rektorja”.
Protestat në Serbi filluan vitin e kaluar dhe vazhdojnë të mbahen çdo fundjavë. Protestuesit kërkojnë shpërndarjen e parlamentit dhe mbajtjen e zgjedhjeve të lira dhe të drejta.
