Prezenca e OSBE-së në Shqipëri po zhvillon sot tryezën për reformën zgjedhore, ku është e pranishme edhe opozita jashtëparlamentare e përfaqësuar nga ekspertët e zgjedhur.
Ndërkaq, ambasadori i OSBE-së, Bernd Borchard u shpreh se partitë politike duhet të ulen në dialog për miratimin e sistemit të ri zgjedhor, ndërsa thekson se vendi ka në nevojë për dialog.
“Dje parlamenti gjerman kaloi një mocion që mbështesin hapjen e negociatave. Reforma zgjedhore është shumë e rëndësishme dhe kjo është edhe në rekomandimet e OSBE-së. Vitin e kaluar ka pasur progres për reformën zgjedhore kanë bashkëpunuar të gjithë aktorët politikë. Do të diskutojmë sot se çfarë efektesh do të ketë sistemi i ri zgjedhor dhe si do të ndikojë më tej. Pres nga partitë që të japin propozime konkrete. Është e rëndësishme ti rikthehemi dialogut, pasi kjo do të ndikojë patjetër te reforma zgjedhore. Shpresoj që kjo konferencë të ndikojë në procesin e mëtejshëm. Është një zgjedhje që duhet ta bëjnë partitë shqiptare. Duhet të jeni të hapur për të diskutuar për këtë çështje. Pjesëmarrja duhet të jetë gjithëpërfshirëse. Duhet të merret vendimi, a duhet ta ndryshojë Shqipëria sistemin zgjedhor. Ne nuk mund të bëjmë imponime, kemi dhënë rekomandimet tona”, tha ai.
