Drejtuesi i Dioqezës së Rrëshenit, Dom Gjergj Meta, pas panikut të krijuar nga tërmetet që goditën vendin, ka reaguar duke përcjellë një mesazh në “Facebook”.
Teksa bën thirrje për ruajtjen e qetësisë, sipas tij, parimi kryesor që duhet të ndiqet është ndarja e “ligjësisë së natyrës me atë të ligësisë njerëzore”.
“Jeta jetohet sot. E nesërmja nuk është në dorën tonë. Ta lëmë natyrën në ligjësinë e saj e të mos e kompromentojmë me ligësinë tonë. Ne kemi në dorë të ndërtojmë marrëdhënie të mira me njëri-tjetrin: kjo është natyra jonë”, shkruan Dom Gjergj Meta.
Po ashtu, nuk ka hezituar të kritikojë përgjegjësit që përhapën lajmet e rreme mbrëmjen e djeshme për një tërmet të shkallës 6 ballë.
Mesazhi i plotë:
Mos ta ngatërrojmë ligjësinë me ligësinë. Të dashur miq, pas kësaj fundjave plot panik, i ligjshëm pjesërisht, por pjesërisht i pajustifikuar, sidomos kur përhapet nga njerëz të papërgjegjshëm, ndjej t’ju uroj një javë të bukur.
Jeta jetohet sot. E nesërmja nuk është në dorën tonë. Ta lëmë natyrën në ligjësinë e saj e të mos e kompromentojmë me ligësinë tonë. Ne kemi në dorë të ndërtojmë marrëdhënie të mira me njëri-tjetrin: kjo është natyra jonë. Toka, universi ka ligjësitë e veta e i rregullon vetë. Po ta keni vënë re sot në mëngjes dielli ka lindur përsëri e toka rrotullohet rreth tij. E do të vazhdojë të jetë kështu.
Të marrim në dorë universin tonë njerëzor. Ne kemi në dorë ta bëjmë dashurinë forcën tërheqëse të këtij universi njerëzor, duke dashur Zotin dhe njëri-tjetrin. Kështu do të krijojmë komunitet solidar që kthehet në shpresë për të gjithë dhe kemi shumë nevojë, sidomos në çaste të vështira.
Lart zemrat e vazhdojmë rrugëtimin! Ditë të bukur
