Drejtori i Institutit të Ndërtimit, Agron Hysenlliu ka sqaruar dhe qetësuar ata qytetarë të cilëve pallati ku ata banojnë ka pësuar çarje ose plasaritje, duke i qartësuar që të mos shqetësohen. Sipas tij, bëhet fjalë për një fugë sizmike, e përcaktuar për raste të tilla dhe që tregon se ka funksionuar për atë që është ndërtuar.
I ftuar në “Report tv”, Agron Hysenlliu bëri të qartë se fugat sizmike janë të çara që janë të pozicionuara në hapësirën midis dy objekteve fqinje për të realizuar vazhdimësi funksionale dhe qëndrueshmëri nga ana konstruktive.
“Unë jam edhe vetë ndërtues. Unë objektet e mia i kam ndërtuar me fugë, ato lejojnë zhvendosjen e objektit në pavarësinë e tyre dhe nuk lejojnë përplasjen nëse janë afër. Këto fuga plasariten dhe nuk ka probleme. Fuga janë hapësira ndërmjet dy objekteve që lejojnë zhvendosjen. Fuga llogaritet mbi lartësinë e objektit, që të mos përplasen. Këto fuga kanë distancë të caktuar për lartësi të caktuar. Pra nuk ka asnjë problem strukturor” tha ai.
