Ditën e sotme kryebashkiaku Erion Veliaj ishte i pranishëm në mbledhjen e grupit parlamentar të PS-së me kryeministrin Edi Rama, ku theksoi se në kryeqytet ka 42 pallate me çarje fuge.
“Kemi 42 pallate që kanë pasur këtë çështjen e hapjes së fugës dhe kemi bërë një raportim të detajuar, në mënyrë që inxhinierët më pas të bëjnë një vlerësim nëse ka nevojë për ndërhyrje strukturore, ose jo. Në fshat paraqitet situata pak më e vështirë, kryesisht në Pezë dhe Ndroq. Kemi rreth 70 shtëpi me dëmtime serioze, kryesisht shtëpi të vjetra të ndërtuara me gurë, të cilat duhet t’i konceptojmë nga e para dhe t’i bëjmë nga e para”, tha Veliaj.
Ky i fundit shtoi se sot do të caktohet edhe buxheti për menaxhimin e rasteve të Tiranës dhe fondin e solidaritetit: “Kemi një mbledhje të Këshillit Bashkiak sot, për të ndryshuar buxhetin, për të përcaktuar një fond për menaxhimin e rasteve të Tiranës dhe sigurisht një fond solidariteti për Durrësin apo kudo tjetër ku të ketë nevojë”.
