Ish-ministri i Brendshëm, Flamur Noka, ka komentuar ashpër procesin gjyqësor ndaj Saimir Tahirit, duke e akuzuar këtë të fundit se i ka përgjuar të gjithë, përfshirë këtu edhe një pjesë të Ambasadave të huaja në Tiranë.
I ftuar në emisionin “Top Talk” në Top Channel, Noka u shpreh se me anë të këtyre përgjimeve ai kontrollon “Shefin e madh”, duke nënkuptuar kështu kryeministrin Rama.
Sa i përket marrjes së vendimit me 3 vite shërbim prove, Noka tha se PD nuk kishte asnjë pritshmëri, pasi ky proces u shkatërrua që në momentin kur u vendos kryeprokurore Arta Marku.
“Pritshmëritë tona i kemi publike që ditën që është emëruar kryeprokurore PPP-ja me emrin Arta Marku. Që ditën që Prokuroria e Krimeve të Rënda u shkatërrua me një të rënë të lapsit dhe hetimi i sapo i nisur nga ish-ministrit Tahiri u ndërpre. Që në atë kohë ne kemi bërë me dije se e gjitha kjo ishte një skenar i Edi Ramës për të shkatërruar hetimin ndaj Saimir Tahirit, pasi siç u vërtetua dje, Edi Rama është peng i Saimir Tahirit, ndërsa drejtësia është peng te Edi Rama. Nuk kemi patur ndonjë pritshmëri në lidhje me vendimin. Por vendimi ishte shok për opinionin publik sepse tregoi që drejtësia e re e Edi Ramës është drejtësi e vdekur”, u shpreh ai.
Më tej, Noka deklaron se me anë të pajisjes Imsi Catcher është përgjuar opozita dhe Ambasadat e huaja në Tiranë. Sipas tij, Tahiri nuk ka pasur nevojë të shantazhojë ambasadorët për sa kohë shantazhon kryeministrin e vendit.
“Pajisja Imsi Catcher, fakti që u fut në mënyrë të fshehtë dhe që ka lëvizur në të gjitha institucionet ku ka opozitë, përfshirë edhe ambasadat e rëndësishme, do të thotë që ajo lëviz vetëm për të përgjuar dhe ka një rreze përgjimi. Nuk ka patur nevojë të shtantazhojë ambasadat e huaja sepse ai ka shantazhuar dhe ka në xhep kryeministrin e vendit”, vijoi Noka.
