Sekretari Organizativ i PD, Sahit Dollapi, ka deklaruar se kjo forcë është gati për zgjedhje të parakohshme parlamentare dhe lokale. Në një intervistë në ‘Shijak TV’, Dollapi ka zbuluar se gjatë muajit gusht, të gjitha strukturat e PD kanë qenë në punë për të përgatitur partinë për zgjedhje të parakohshme parlamentare dhe lokale në të njëjtën ditë.
Synimi i tyre është që këto zgjedhje të jenë të lira e të ndershme, ku përballja të jetë për alternativën më të mirë, dhe jo për të fortin.
“PD ka një strukturë gjigante me 71 degë brenda vendit, 6 degë jashtë vendit, 872 grupseksione dhe mbi 5700 seksione, që korrespondojnë me qendrat e votimit dhe ku është bërë një punë kolosale për një organizim më të mirë, për identifikimin e çdo resursi dhe aktivizimin në çdo kohë për përballjen elektorale.
Qëllimi kryesor i kësaj pune të jashtëzakonshme është përgatitja e partisë për zgjedhje të parakohshme parlamentare dhe lokale në të njëjtën ditë. Ne synojmë që këto të jenë zgjedhje të lira e të ndershme, ku përballja të jetë për alternativën më të mirë, dhe jo për të fortin, kriminelin apo banditin e rradhës”, ka thënë Dollapi.
