Në një kohë kur kriza politike në Shqipëri vijon të thellohet, është njoftuar se SHBA-ja pritet të sjellë në Tiranë një zyrtar të lartë.
Raportohet se këtë javë, Drejtori për Evropën Qendrore dhe Jugore në Departamentin Amerikan të Shtetit David Kostelancik, do të zhvillojë një vizitë zyrtare në kryeqytet. Kostelancik do të ketë takime me liderët kryesorë në vend dhe përfaqësues të forcave politike për zgjidhjen e krizës. Ditën e enjte zyrtari i lartë amerikan pritet të takohet me liderin e opozitës Lulzim Basha.
Kujtojmë se Kostelancik është një diplomat karriere. Më herët ka qenë edhe pjesë e stafit të ambasadës së SHBA-së në Tiranë. Deri në korrik ai ka qenë zëvendës ambasador i SHBA-së në Hungari. Gjithashtu ka mbuluar në DASH marrëdhëniet me Rusinë.
