Dy persona janë arrestuar për vrasjen e 68-vjeçarit shqiptar, i cili punonte si roje sigurie në Korydallos, Greqi.
Viktima u gjend i pajetë mëngjesin e 17 qershorit, ndërsa raportohet se kishte pësuar dëmtime në kokë, kraharor dhe në krahun e djathtë. Vajza e tij, deklaroi në polici se i ati e kishte marrë në telefon në orën 2:40 të mëngjesit, ndërsa i tha se kishte qenë viktimë e një grabitjeje. Personi që shkoi në vendin e ngjarjes, tha se shqiptari ishte gjetur i rrahur dhe i lidhur.
“Viktima u sulmua nga dy persona të panjohur që kishin hyrë në kompani për vjedhje. Teksa grabitësit ishin pikasur nga roja, ata nuk nguruan që ta dhunonin dhe lidhnin në vendin e punës”, thuhet në njoftimin e policisë.
Të arrestuarit, të cilët dyshohen se janë autorët e këtij krimi, janë përkatësisht 43 dhe 46 vjeç. Njëri prej tyre kishte punuar si shofer në të njëjtën kompani, deri në muajin maj.
