Kreu i Bashkisë së Vorës, Agim Kajmaku, ka sqaruar qytetarët pas akuzave të parashtruara më herët nga ana e PD-së.
Me një postim në faqen e tij në Facebook, më daten 6 gusht, Kajmaku ka postuar gjithë dokumentet, me të cilat, sipas tij, fakton se gjithë sa thuhen janë të pavërteta dhe ai rezulton i padënuar.
PD i kërkon Prokurorisë verifikimin e një tjetër kryebashkiaku të Ramës
Ai sqaron se si shumë shqiptarë që kanë emigruar në Greqi në vitet ’90, i është dashur që të ndryshojë emrin dhe mbiemrin për tu pajisur me dokumente qëndrimi. Po kështu, edhe ndryshimin e emrit dhe mbiemrit nga Agim Kajmaku në Jorgo Toto, një akt të cilën nuk e ka kryer në shkelje të ligjit. Sipas tij, falë këtij ndryshimi ai mundi që të sigurojë një vizë nga Ambasada Greke për vete dhe familjen.
Prej vitit 1996, bashkë me bashkëshorten hapën një biznes. Agim Kajmaku thotë se e ka drejtuar vetë këtë biznes deri në korrik të vitit 2019, kur u zgjodh Kryetar i Bashkisë Vorë. “Me vendim të Këshillit të Komunës Prezë, Nr 19, Datë 30.03.2004, kam ‘Ndryshim emri dhe mbiemri nga Jorgo Toto në Agim Kajmaku”. Kjo për shkak se jo vetëm mundësitë e biznesit ishin zgjeruar në vende të tjera të Evropës, por sipas tij, lindi nevoja të administronte pronat e familjes.
Statusi
Unë ashtu si dhe shumë e shumë shqiptarë që kanë emigruar në Greqi në vitet `90, më është dashur të ndryshoj emrin dhe mbiemrin për tu pajisur me dokumenta qëndrimi. Sepse fatkeqsisht ky ka qenë niveli i mbrojtjes për emigrantët nga shteti Shqiptar në ato kohë kur Sali Presidenti i futi dy gishtat në sy këtij vendi.
Këtë gjë nuk e kam bërë në shkelje të ligjit, por me Vendim të Këshillit të Komunës Prezë, Nr 06/1, Datë 06.02.1996, “Ndryshim emri dhe mbiemri nga Agim Kajmaku në Jorgo Toto”. Përmes këtij ndryshimi, munda që të siguroj një vizë nga Ambasada Greke për vete dhe familjen.
Prej vitit 1996, bashkë me bashkëshorten time Rita, hapëm një biznes tregëti Lulesh Natyrale. E kam drejtuar vetë atë biznes deri në korrik të vitit 2019 kur u zgjodha Kryetar i Bashkisë Vorë. Biznesin e nisëm me furnizim nga shteti Grek dhe kemi punuar për rreth 8 vjet, deri në vitin 2004 me Greqinë.
Ndërkohë me vendim të Këshillit të Komunës Prezë, Nr 19, Datë 30.03.2004, kam “Ndryshim emri dhe mbiemri nga Jorgo Toto në Agim Kajmaku”. Kjo për shkak se jo vetëm mundësitë e biznesit ishin zgjeruar në vende të tjera të Evropës, por lindi nevoja të administroja pronat e familjes time.
Pavarësisht ndryshimit të emrit për arsye dokumentare, unë Agim Kajmaku gjithmonë kam mbajtur të njejtin emër të babait, nënës dhe të ditës time të lindjes edhe me emrin Jorgo Toto. Prandaj është shumë kollaj e verifikueshme a kam qëne i dënuar apo jo.
E dija që kur i hyra kësaj rruge për të drejtuar Bashkinë e Vorës, se Sali Baba me dyzet qentë e tij do të sulmonin për me kafshu! Prandaj kalova kufirin para se të dorëzoja kandidaturën time, që t’i kisha këto foto me të cilat përshëndes Sali Babën dhe dyzet qentë e vet dixhital.
Konkretisht më poshtë janë:
- Certifikata Personale me shënimin përkatës për ndryshimet e ligjshme të emrit;
2. Dëshmi e Penalitet lëshuar nga Ministria e Drejtësisë në Shtetin Grek ku bazuar në Regjistrin Kombëtar Penal, personi Jorgo (Agim) Toto (Kajmaku) rezulton I PADENUAR;
3. Formulari i Vetë Deklarimit në zbatim të ligjit Nr. 138/2015 “Për garantimin e integritetit të personave që zgjidhen, emërohen ose ushtrojnë funksione publike”, ku parashtrohen gjeneralitetet e mëparshme.
4. Foto e Vulave të Pikave të Kalimit Kufitar në Maj 2019.
Po, kam ndryshuar emrin!
Po, kam zbatuar ligjin dhe e kam deklaruar kudo e kurdo!
Jo! Nuk kam qenë asnjëherë i dënuar.
