Sulmet e fundit me armë në SHBA i kanë futur njerëzit në panik, teksa mediat e huaja raportojnë se po rritet numri i interesimit për çanta shpine të blinduara. Këto çanta po blihen nga prindërit, të cilët kanë frikë se fëmijët e tyre mund të bien pre e dhunës me armë.
“Është jashtëzakonisht dëshpëruese”, tha Igor Volsky, drejtori i Guns Down America, një grup mbrojtës për kontrollin e armëve, për The New York Times.
“Tregu po përpiqet të zgjidhë një problem që politikanët tanë nuk kanë pranuar ta zgjidhin”, deklaroi tutje Volsky.
Tregtimi i këtyre çantave nisi për herë të parë pas ngjarjes së vitit 2018 në Parkland, Florida, ku disa të shtëna në shkollë, lanë të vdekur 17 studentë dhe staf akademik, si dhe lanë të plagosur 17 të tjerë.
Kompanitë që shesin çanta shpine të papërshkueshme nga plumbi pas masakrës së fundit duan 100 deri 200 dollarë për produktin e tyre, të cilat mund t’i gjeni në Office Max, Office Depot dhe Kmart.
