Armenda Velija, 41-vjeçarja që u qëllua për vdekje nga bashkëshorti i saj mbrëmjen e djeshme në Prizren, është nëna e nënkryetares së AAK-së dhe këshilltare politike e kryeministrit në largim Ramush Haradinaj, Diellza Hotit.
Lajmin për këtë e ka bërë të ditur vetë Hoti përmes një fotografie të cilën e ka shpërndarë në rrjetin social ‘Instagram’.
“Pusho e qetë në paqe mami jem, engjëlli jem”, shkruan vajza e të ndjerës. Mësohet se viktima ishte martuar disa vite më parë me 61-vjeçarin dhe nuk kishin fëmijë, ndërsa ka dy vajza nga martesa e parë.
Lidhur me këtë fatkeqësi ka reaguar edhe kryeministri Ramush Haradinaj, i cili shkruan se ndjehet thellësisht i prekur nga ky lajm.
“Thellë i prekur nga vdekja tragjike e Armenda Aliut, mikes sonë dhe nënës së koleges nga kabineti Diellza Hoti. Ngushëllime familjes dhe miqve. I qoftë i lehtë dheu i Kosovës! RH”, shkruan Haradinaj në “Facebook”.
