Drejtoresha e Qendrës së Kulturës, Artit dhe Muzikës në bashkinë e Matit, Denisa Vata, ka dhënë dorëheqjen nga posti i saj ditën e sotme. Sipas Vatës, ajo e ka marrë këtë vendim për shkak të ndërrimit të pushtetit në këtë bashki.
Në shkresën e dorëheqjes së saj, Denisa Vata deklaron se vendimi i saj vjen pas konstituimit të Këshillit Bashkiak dhe betimit të kryebashkiakut të ri Agron Malajt, ish-gardisti i 21 Janarit.
“Nisur nga fakti që në bashki kanë hyrë pushtues të cilët duhet të ishin përballë drejtësisë, gjithashtu edhe që Bashkia është uzurpuar nga drejtues pa zgjedhje dhe në mohim të votës së tyre të lirë, nisur nga fakti që sot bashkia nuk i përket qytetit dhe qytetarëve, por hajdutëve dhe pazarxhinjve, unë si një e re me shpresë te e mira e vendit tim dhe te vota e lirë, nuk mund të jem pjesë e së keqes dhe e diktaturës”, thuhet në letrën e Vatës.
