Ish-ministri i Financave, Arben Malaj, ka shkuar sot në mbështetje të artistëve dhe qytetarëve qe po përballen me policinë, e cila ka rrethuar Teatrin Kombëtar. Ai ka dhënë mesazhe të forta në mbrojtje të godinës së Teatrit Kombëtar.
Malaj apeloi për ndërhyrjen e Erjon Braçes dhe Pandeli Majkos, që të ndalojnë prishjen e Teatrit Kombëtar.
Duke folur para turmës, Malaj tha se duhet që të gjitha palët të bëjnë maksimumin për të gjetur një zgjidhje.
“Të dashur protestues dhe policë. Kam ardhur këtu me mesazhin e Nënë Terezës. Ministria e Kulturës të heqë policët nga institucioni. Ministri Majko dhe socialisti shumë i mirë Erjon Braçe, të kërkojne një vendim qarkullues. Të bllokohet rrethimi nga policia dhe të bllokohet aktiviteti në Teatrin Kombëtar. Nëse Majko e Braçe e duan këtë vend, ajo bëhet gati për 20 minuta. Nëse qeveria nuk e bën, vendim qarkullues për mos prekjen e Teatrit i takon Kuvendit, Gramoz Ruçi të mbledhë deputetët, të mundësohet ndalimi i ndërhyrjes tek Teatri. Pas kësaj, të gjithë së bashku të bëjmë zgjidhjen më të mirë”, tha ai.
