Forca të shumta policie kanë zbarkuar para godinës së Teatrit Kombëtar, ku artistët e kanë gdhirë në protestë kundër shembjes. Efektivët kanë rrethuar Teatrin Kombëtar dhe artistët thonë se po nis aksioni për zbrazjen e orendive nga godina.
“Si do ndiheni para fëmijëve tuaj, do të ndiheni shumë keq. Çfarë do t’u thoni familjeve, fëmijëve, historisë? Hidheni kapelen dhe tregoni se jeni shqiptarë të mirë, se mbroni vendin, historinë, traditën dhe këtë vend”, thonë artistët që vijojnë të qëndrojnë para godinës në mbrojtje të Teatrit. Mësohet se forcat e policisë ndodhen aty për të siguruar punonjësit e administratës së Teatrit, të cilët do të bëjnë nxjerrjen e materialeve dhe zhvendosjen e tyre.
Burime nga PD-ja bëjnë me dije se në mbështetje të artistëve po shkojnë edhe ish-deputetë demokratë.
Përgjatë një deklarate mediatike regjisori Robert Budina theksoi se artistët janë të vendosur ta mbrojnë deri në fund Teatrin Kombëtar: “Do ta rrethojmë me trupat tanë Teatrin Kombëtar. I bëj thirrje qytetarëve që në këtë moment të na mbështesin. I ftoj në një qëndresë pa dhunë, me fjalët tona do i ‘çarmatosim’. Qëndresa jonë është leksion për demokracinë”.
