Tre vite nga fillimi i saj, reforma në drejtësi ka arritur të lërë jashtë sistemit më shumë se gjysmën e prokurorëve dhe gjyqtarëve. Shumica se kaloi dot filtrin e vettingut, për shkak se pasurive të pa jusfikuara. Të tjerët u tërhoqën vetë nga sistemi, para se t’i nënshtroheshin vettingut. Shumat marramendëse të parave dhe pasurive të paluajtshme, treguan sa i korruptuar ka qenë gjyqësori shqiptar.
Dje mazhoranca u vetëmburr, dhe përvetësoi meritat e kësaj reforme. Ndërkohë, presidenti Ilir Meta, nuk e denoncoi reformën si “Ramaformë”. Duke publikuar në FB një video të seancës së 22 korrikut 2016, ai tha se falë tij, reforma nuk u kap nga PS, dhe ishte konsensuale. Por harroi të përmendë presionin e madh, që SHBA ushtroi ndaj tij dhe Bashës, për të votuar nisjen e asaj reforme.
Në vend të tij, “Ramaforma” u sulmua nga LSI përmes Monika Kryemadhit, e cila kërkoi ndryshimin e saj. Deri më sot, reforma e ka shndërruar sistemin në një kantier, dhe ka rritur pritshmërinë e qytetarëve. Por vetëm kaq. Qytetarët vazhdojnë të sorollaten ende gjykatave, duke mos marrë drejtësi. Deri tani, të gjitha gjyqet i ka fituar vetëm kreu i grupit parlamentar socialist, Taulant Balla.
Për të tjerët, gjërat lëvizin vetëm po u denoncuan në media. Reforma, përdoret në luftën politike si një “gogol”, për të trembur kundërshtarin. Situata justifikohet me kaosin në sistem, ndaj kërkohet durim. Shqiptarët janë mësuar të durojnë dhe të presin, dhe në këtë rast s’kanë zgjidhje tjetër. Por në këto kushte, s’ka ende asgjë për të festuar./ TIRANA TODAY
