Ministrja e Financave thirrje bizneseve: Respektoni ligjet përndryshe…
Ministrja e Financave dhe Ekonomisë, Anila Denaj ka inspektuar gjatë ditës së djeshme disa subjekte që operojnë në zonën e bregdetit tek shkëmbi i Kavajës, në Durrës. Inspektimi është kryer në vazhdim të aksionit kundër informalitetit dhe është fokusuar kryesisht në sektorin e hotelerisë.
Pas regjistrimit dhe pajisjes me NIPT, administrata tatimore vendosi ta zhbllokojë aktivitetin e një biznesi, i cili kishte rezultuar më parë me probleme dhe ishte mbyllur.
Ministrja Denaj u bëri thirrje të gjitha bizneseve që të respektojnë ligjet, jo vetëm sa i përket regjistrimit të një biznesi por edhe plotësimin e të gjitha rregullave të tjera që lidhen me funksionimin e një subjekti.
“Shpresoj që ju të paktën të kuptoni që kjo nuk është e qëllimshme, nuk është për të penguar punën tuaj. Përkundrazi, në momentin që ju e regjistruat dje ne e po e zhbllokojmë menjëherë. Sot është e shtunë dhe i gjithë ekipi është duke punuar të shtunë dhe të diel. Edhe në këto situata ne jemi në ndihmën tuaj. Por është e pamundur që të regjistroheni më parë në booking, para organeve administrative në Shqipëri”, u shpreh ministrja e Financave dhe Ekonomisë.
Drejtuesja e dikasterit të financave gjithashtu theksoi rëndësinë e regjistrimit të një biznesi jo vetëm në QKB dhe organet tatimore, por edhe respektimin e të gjithë rregullave të tjera që lidhen me funksionimin e një subjekti, si deklarimi i punonjësve, lidhja e kontratës së energjisë elektrike me OSHEE dhe kontrata e furnizimit me ujë.
