Në moshën 90-vjeçare është ndarë nga jeta shkrimtari i famshëm italian Luciano De Crescenzo. Shkrimtari, regjisori dhe aktori napolitan vuante prej vitesh nga një sëmundje neurologjike. I ashtuquajturi “Inxhinieri filozof”, simboli i fundit i kulturës napoletane, De Crescenzo, ka shkruar më shumë se 50 libra, dhe ka shitur më shumë se 18 milion kopje në botë, mes të cilave 7 milion vetëm në Itali.
Veprat e tij janë përkthyer në 19 gjuhë të botës dhe janë shpërndarë në 25 vende. Pas një karrierë si inxhinier informatik, në 1976 ai la punën për t’u bërë shkrimtar. Një vit më pas del ‘Bellavista’. Romani i tij i parë u bë një bestseller, duke shitur më shumë se 600 000 kopje. Në libër shfaqet personazhi i profesor Bellavistas, që i jep leksione jete inxhinierit De Crescenzo. Gjatë karrierës së tij ai ka shkruar shumë vepra, mes të cilave më të njohurat “Oi dialogoi” (1985), “Fosse ’a Madonna!” (2012), “Garibaldi ishte komunist” (2013). Edhe libri i shkruar për jetën e tij nga vetë ai, “Vita di Luciano De Crescenzo” (1989), u bë një bestseller. Ai më pas debutoi si aktor në “Il pap’occhio” (1980) në rolin e një prifti, në krah të mikut të tij Roberto Benigni.
Ai gjithashtu ka luajtur edhe në krah të aktores Sofia Loren në ‘Sabato domenica e lunedi’ të Wermuller. Në ekranin e madh ai ka qenë regjisor dhe aktor në katër filma ‘Kështu flet Bellavista’, 1984, ‘Misteri i Bellavista’, 1985, ‘32 dhjetor’, 1988, ‘Kryqi dhe kënaqësia’ në 1995.
