Kryetari i Kuvendit të Kosovës, Kadri Veseli ka zhvilluar një takim me Udhëheqësen e Dhomës së Përfaqësuesve të SHBA-së, Nancy Pelosi, ku kjo e fundit ka shprehur mbështetjen e shtetit amerikan ndaj Kosovës.
Në një komunikatë për mediat kosovare, thuhet se Pelosi është zotuar se do të jetë gjithmonë në përkrahje të Kosovës, dhe se ajo mund ta llogarisë në ndihmën e saj dhe të Kongresit Amerikan.
“Amerika do të jetë përkrah Kosovës dhe do t’ju mbështesë gjithmonë”, tha Pelosi.
Veseli, në anën tjetër, kërkoi nga Pelosi që SHBA-ja të ketë përfshirje edhe më të madhe dhe më të drejtpërdrejtë në proceset që po kalon Kosova.
“Gjatë këtij takimi, Veseli po ashtu ka kërkuar nga zonja Pelosi përkrahje të Kongresit dhe institucioneve të SHBA-së për ushtrinë e Kosovës, si dhe për iniciativën për dënimin e gjenocidit serb dhe të krimeve dhe dhunimeve gjatë luftës në Kosovë”, thuhet në komunikatën e nxjerrë nga zyra e Veselit.
