Sikundër ka paralajmëruar, opozita e bashkuar do të zhvillojë ditën e sotme protestën e radhës kombëtare.
Ndërkohë, 1 200 mbështetës të opozitës nga Berati janë nisur drejt kryeqytetit. Ata janë grumbulluar si gjithmonë përpara selisë së PD-së së qytetit, ku u nisën me autobusë dhe automjete private drejt Tiranës, ndërsa protestuesit e LSI-së u nisën me automjete private nga sheshi i qytetit.
Kryetari i degës së Partisë Demokratike Berat,Gazmend Azizi,ka deklaruar se nga selia blu u nisën drejt protestës së dhjetë të opozitës rreth 900 protestues, kurse nga LSI-ja konfirmohet një numër prej rreth 300 protestuesish të nisur me automjete private.
Po ashtu dhe simpatizantët vlonjatë të opozitës janë nisur drejt Tiranës, për t’iu bashkuar protestës që do të mbahet në orën 20:00, në Bulevardin “Dëshmorët e Kombit”. Raportohet se në total janë nisur 6 autobusë, me rreth 1000 protestues.
