Presidenti serb Aleksandër Vuçiç ka ngritur akuza ndaj Shqipërisë, pasi, sipas tij po pengon hetimet duke mos lëshuar informacione lidhur me aktivitetin e dy personave të dyshuar për vrasjen e politikanit Oliver Ivanoviç.
“Pyes përse nuk na i japin videot nga aeroporti i Tiranës, Rinasi. Përse nuk mund të gjejmë dëshmi se çfarë ka bërë Florim Ejupi, i cili është nën vëzhgim në Gjermani dhe çfarë ka bërë ai në aeroportin e Tiranës, prej nga ka udhëtuar drejt Gjermanisë. Çfarë ka bërë Nexhmedin Zekaj, i cili ka ndërruar emrin e tij në Lirim Zekaj më pas? Këto janë të gjitha pyetje për të cilat ne nuk mund të marrim përgjigje”, u shpreh Vuçiç.
Sipas presidentit serb, një pjesë e këtyre dëshmive mund të jenë edhe në aeroportin e Tiranës, ndërsa theksoi se ka shumë dëshmi kontradiktore që nuk kanë mundur të verifikohen në mungesë bashkëpunimi.
