Ish-presidenti Alfred Moisiu ka komentuar me nota negative situatën politike të krijuar në Shqipëri, duke e u shprehur se gjendja aktuale paraqitet e çmendur dhe se fajin për këtë e ka e gjithë klasa politike shqiptare.
I ftuar në emisionin “Kjo javë” në News24, Moisiu tha se nëse do të shtyhej 30 qershori do i hapej rruga një precedenti të rrezikshëm, ndërsa ka shtuar se opozita nuk duhej të tërhiqej nga parlamenti, por të luftonte politikisht.
“Nëse shtyhet data 30 qershor si datë për zgjedhje, i hapet rrugë një precedenti të rrezikshëm. Kudo ka probleme në zgjedhje. Opozita nuk duhet të tërhiqet, por të luftojë politikisht. Nuk duhet të lëvizte 30 qershori, pasi do të kishte precedent”, deklaron ish-presidenti.
Deklarata e plotë:
“Kjo situatë nuk është e mirë dhe nuk duhet të ndodhte. Për këtë ka përgjegjësi e gjithë klasa politike shqiptare. Po ekspozojmë një pjesë të keqe të shoqërisë shqiptare. Kriza është artificiale, mirëpo ndikimi është real. Opozita ka të drejtë në disa aspekte. Duhet kthjellësi, e cila ka humbur. Po kthehemi pas si në vitin 1991.
Nëse shtyhet data 30 qershor si datë për zgjedhje, i hapet rrugë një precedenti të rrezikshëm. Kudo ka probleme në zgjedhje. Opozita nuk duhet të tërhiqet, por të luftojë politikisht. Nuk duhet të lëvizte 30 qershori, pasi do të kishte precedent. Kjo situatë ka ndodhur edhe më 2017, mblodha partitë dhe në fund u arrit vendimi. Në orën 24..00 u firmos marrëveshja mes forcave politike parlamentare.
Kur isha president, unë arrita të bind palët politike. I kërkova ndryshime në atë kohë Kuvendit. Kishte kohë dhe nuk e kuptoj pse nuk janë mbledhur për 4 muaj. Kjo situatë është e çmendur. Nuk mundet dhe nuk duhet të kishin arritur në këtë ditë. Kjo situatë aspak nuk duhej lejuar, as nga maxhoranca, as nga opozita.
Ne jemi demokraci e brishtë. Ne kemi tradita diktature dhe jo demokratike. Kjo është arsyeja përse ndërkombëtarët vijnë dhe na takojnë, zhvillojmë biseda etj. Nuk bën keq ndërkombëtarët që nuk ndërhynë. Këto gjërat duhet të zgjidhen vetë. Kjo tregoi se klasa politike jonë është e paaftë”.
