Pasditen e sotme Kreu i Shtetit Ilir Meta reagoi përmes një deklarate zyrtare lidhur me klimën e tensionuar politike në vend.
“U bënë dhjetë ditë që është në fuqi dekreti i Presidentit të Republikës për anulimin e datës së zgjedhjeve më datë 30 qershor, me qëllim qetësimin e situatës dhe krijimin e mundësive për dialog, që do të normalizonte situatën politike dhe do të krijonte mundësinë për një datë të re të zgjedhjeve vendore, gjithëpërfshirëse dhe demokratike. Theksoj sërish se nuk është kurrsesi momenti për prova force, për retorikë përçarëse dhe provokuese, por për maturi dhe përgjegjshmëri të lartë për interesat kombëtare të vendit dhe vazhdimësinë e integrimit evropian që është objektiv kombëtar i të gjithë shqiptarëve. Sërish insistoj me forcë rëndësinë e dialogut mes palëve e njëkohësisht gatishmërinë time për të kontribuar për një zgjidhje sa më të shpejtë”, thuhej në deklaratën e presidentit.
Mirëpo deklarata në fjalë nuk është pritur aspak mirë nga Ministrja e Shtetit për Marrëdhëniet me Parlamentin, Elisa Spiropali.
Lidhur me përplasjet në KZAZ ajo thumbon Metën duke shkruar se ai pret më shumë dhunë.
Spiropali i është përgjigjur përmes një postimi në Twitter reagimit të sotëm të presidentit Ilir Meta: “U bënë dhjetë ditë nga ç’dekreti antidekret i dekretit të Ilir Metës dhe të gjithë e shohin se si Ilir Meta i hodhi benzinë zjarrit që pretendon se po mundohet të shuajë. Për aspak çudi akoma se ka thënë asnjë fjalë për dhunën talebane mbi KZAZ. Ndoshta sepse pret më shumë dhunë”.
