Presidenti Ilir Meta ka reaguar për tensionet që kanë ndodhur në Shkodër dhe në Tropojë, në lidhje me procesin zgjedhor. Nëpërmjet zëdhënësit të tij, kreu i shtetit thekson se mban shënim të gjithë personat që shkelin ligjin, dhe provokojnë tensione artificiale. Po kështu, në njoftimin në fjalë citohet se presidenti Meta vlerëson të gjitha institucionet që zbatojnë ligjin, dhe i inkurajon që ta bëjnë këtë me përgjegjshmëri maksimale dhe transparencë të plotë.
Reagim i zëdhënësit të Presidentit të Republikës, Tedi Blushi
“Presidenti Meta vlerëson të gjitha institucionet që zbatojnë ligjin dhe i inkurajon që ta bëjnë këtë me përgjegjshmëri maksimale dhe transparencë të plotë. Presidenti mban shënim të gjithë personat që shkelin ligjin dhe provokojnë tensione artificiale, të cilat u shërbejnë vetëm atyre grupimeve të errëta vendase dhe të huaja, që kërkojnë destabilitet në Shqipëri dhe rajon, me qëllim defaktorizimin e Shqipërisë dhe shqiptarëve”.
Ky reagim erdhi pasi KQZ, në një deklaratë për mediat theksonte se dekreti i Presidentit Ilir Meta për shfuqizimin e datës së zgjedhjeve është inekzistent.
“KQZ i bën thirrje të gjitha organeve publike që ngarkon ligji me detyra në kuadër të mbarëvajtjes dhe organizimit të zgjedhjeve vendore të datës 30 qershor 2019, të konsiderojnë si inekzistent aktin e Presidentit për shfuqizimin e dekretit, dhe të vijojnë përmbushjen e detyrave të tyre për të garantuar të drejtën kushtetuese të shtetasve shqiptarë, për të zgjedhur përfaqësuesit e tyre në pushtetin vendor”, deklaroi zëdhënësja e KQZ-së.
