Debati për zhvillimin apo jo të zgjedhjeve vendore më datë 30 qershor vazhdon të jetë çështja kryesore në vend. Dekreti i presidentit Meta për shtyrjen e zgjedhjeve ka bërë që disa nga institucionet vendore të reagojnë duke nisur shkresa zyrtare ndaj Komisionit Qendror të Zgjedhjeve për tërheqjen e materialeve zgjedhore.
Bashkia e Shkodrës, Skraparit, e Delvinës, e Gjirokastrës,Tropojës, Matit etj, janë disa nga institucionet të cilat kanë kërkuar lirimin e menjëhershëm të ambienteve të KZAZ-ve përkatëse si dhe heqjen e materialeve të publikuara dhe afishuara në institucionet arsimore të cilat janë në pronësi të bashkive.
Shkresat janë dërguar nga bashkitë në adresë të KQZ-së me arsyetimin se po zbatojnë vendimin e Presidentit për shtyrjen e votimeve.
Këto shkresa mbajnë firmën e kryebashkiakes së Shkodrës Voltana Ademi, kryetarit të bashkisë së Skraparit, Nesim Spahiu, atij të Delvinës, Rigels Balili dhe të kryetares së bashkisë së Gjirokastrës, Zamira Rami etj.
Bashkia e Kukësit ishte para që e mori këtë vendim pak ditë më parë duke u shprehur se do të zbatojë dekretin e Presidentit Meta për shfuqizimin e 30 qershorit si datë të zgjedhjeve lokale.
